Cwblhau'ch trafodiad

Byddwch rŵan yn mynd i'r Porth Talu Civica i gwblhau eich taliad.

Gwiriwch eich bod wedi cofrestru ar gyfer bancio ar-lein. Mae pob banc yn wahanol, felly gwiriwch gyda’ch banc cyn gwneud cais ar-lein.

Gwnewch yn siŵr, pan fyddwch wedi cwblhau eich taliad a derbyn eich “Rhif Derbynneb” eich bod yn clicio'r botwm “Gorffen” (mae'r botwm o dan y bwlch sy'n gofyn am eich cyfeiriad e-bost er mwyn i chi gael derbynneb gan y porth talu). Os nad ydych yn gwneud hyn, ni fydd Sir y Fflint yn derbyn eich cais cyflawn.

Bydd eich data’n cael ei brosesu gan Gyngor Sir y Fflint fel rhan o’n tasg gyhoeddus at ddibenion penodol gweinyddu a phrosesu eich cofrestriad ar gyfer Casglu Gwastraff Gardd o dan Ddeddf Diogelu’r Amgylchedd 1990. Mae’n bosibl y bydd yr wybodaeth a gasglwyd gennych yn cael ei defnyddio fel a ganlyn:

I fonitro ac adrodd yn ôl ar nifer yr unigolion sy’n talu am y gwasanaeth Casglu Gwastraff Gardd yn Sir y Fflint at ddibenion data ac ystadegau. Gall yr ystadegau hyn gael eu rhannu gyda chasglwyr data allanol at ddibenion adrodd.

Bydd Cyngor Sir y Fflint yn cadw gwybodaeth nes bod y gwasanaeth yn cael ei ddisodli + 1 blwyddyn.

Os ydych chi’n credu bod Cyngor Sir y Fflint wedi camddefnyddio eich data personol ar unrhyw adeg, gallwch chi wneud cwyn i Swyddfa'r Comisiynydd Gwybodaeth drwy fynd i’w gwefan nhw neu ffonio eu llinell gymorth ar 0303 123 1113.

I gael rhagor o wybodaeth am sut mae Cyngor Sir y Fflint yn prosesu data personol a’ch hawliau, darllenwch ein hysbysiad preifatrwydd ar ein gwefan https://www.siryfflint.gov.uk/cy/Resident/Contact-Us/Privacy-Notice.aspx

Gwneir y cytundeb hwn rhwng y preswylydd (‘Cwsmer’) a Chyngor Sir y Fflint (‘y Cyngor’) o Ddepo Alltami, Ffordd yr Wyddgrug, Alltami, Sir y Fflint, CH7 6LG, ac mae’n nodi’r Telerau ac Amodau i’r Cwsmer allu defnyddio Gwasanaeth Casglu gwastraff gardd bob pythefnos y Cyngor (‘y Gwasanaeth’). Gall y Cyngor amrywio neu newid y Telerau ac Amodau hyn o bryd i’w gilydd. Bydd y Cwsmer yn cael rhybudd ysgrifenedig o 10 diwrnod am unrhyw newidiadau o’r fath.

1. Yn unol â Rheoliadau Contractau Defnyddwyr (Gwybodaeth, Canslo a Thaliadau Ychwanegol) 2013, mae gan y Cwsmer 14 diwrnod o dderbyn y Telerau ac Amodau hyn i ofyn am ganslo’r Gwasanaeth. Rhaid gwneud ceisiadau i ganslo’r Gwasanaeth yn ysgrifenedig i Gyngor Sir y Fflint, Depo Alltami, Ffordd yr Wyddgrug, Alltami, Sir y Fflint, CH7 6LG neu drwy e-bost, streetscene@flintshire.gov.uk. Ni ellir canslo dros y ffôn
2. Bydd casgliadau’r Gwasanaeth ar gael i Gwsmeriaid sydd wedi tanysgrifio i’r Gwasanaeth ymlaen llaw ac yn byw yn Sir y Fflint yn unig. Bydd y Cyngor yn penderfynu gwagio neu adael bin gwastraff gardd brown a gyflwynir i’w gasglu oddi wrth y sticer neu’r tocyn adnabod ar y bin, ynghyd â darllenydd cod bar electronig (ac a yw’r bin gwastraff gardd brown yn cynnwys unrhyw ddeunydd wedi’i halogi – gweler Cymalau 11 a 12).
3. Mae tanysgrifiadau Cwsmeriaid yn gallu cael eu hadnewyddu bob blwyddyn ar gyfer y tymor casglu canlynol (‘Cyfnod Tanysgrifio’). Dim ond Cwsmeriaid sydd wedi talu am eu tanysgrifiad sy’n gymwys i gael y Gwasanaeth. Bydd y Cwsmer yn cael gwybod am unrhyw gynnydd yn y pris cyn dechrau Cyfnod Tanysgrifio newydd

4. Mae’r tanysgrifiad i’r Gwasanaeth yn cynnwys tâl blynyddol fel y ganlyn

   • Taliadau cyn 28 Chwefror 2024 = £35.00 fesul bin
   • POB taliad ar-lein (trwy gydol y tymor casglu) = £35.00 fesul bin
   • Cyfradd safonol o 1 Mawrth 2024 = £38.00 fesul bin

   Mae’r tâl hwn i’r Cwsmer ar gyfer casglu un bin gwastraff gardd brown, sydd wedi’i bennu gan y Cyngor am y cyfnod o fis Mawrth tan fis Rhagfyr. Mae prisiau tanysgrifio’n destun adolygiad yn ôl disgresiwn y Cyngor

5. Gellir darparu biniau gwastraff gardd brown ychwanegol. Bydd tâl o £30 am bob bin gwastraff gardd brown ychwanegol (nid yw hyn yn cynnwys casglu’r bin ychwanegol). Bydd hyn wedi’i gyfyngu i uchafswm o 3 bin. Ni chaniateir i Gwsmer ddefnyddio mwy na 3 bin gwastraff gardd brown yn rhan o’r Gwasanaeth.
6. Rhag unrhyw amheuaeth, mae unrhyw fin gwastraff gardd brown a ddarperir i'r Cwsmer gan y Cyngor (yn cynnwys unrhyw rai newydd) dan drwydded arbennig sy'n gallu cael ei diddymu, a bydd unrhyw fin o'r fath yn gorfod cael ei ddefnyddio'n unol â'r Telerau ac Amodau hyn. Ni chaniateir i'r Cwsmer is-drwyddedu a bydd y Cyngor yn cadw perchnogaeth o'i holl Hawliau Eiddo Deallusol.
7. Mae’r Cyngor yn gwagio biniau gwastraff gardd brown bob pythefnos, rhwng 1 Mawrth a 14 Rhagfyr bob blwyddyn. Efallai y bydd adegau pan na fydd yn bosib’ casglu bin brown y Cwsmer, yn cynnwys, ond nid yn gyfyngedig i: dywydd garw iawn, cerbydau’n torri a/neu weithredu diwydiannol. Os yw’r Cyngor yn methu casglu bin gwastraff gardd brown y Cwsmer, fel a drefnwyd, bydd y Cyngor yn gwneud pob ymdrech resymol i gasglu’r bin(iau) cyn gynted â phosib’. Ni fydd y Cyngor yn rhoi ad-daliadau (llawn neu rannol) mewn unrhyw achos, am fethu neu am nad oedd yn gallu casglu bin gwastraff gardd brown
8. Y Cwsmer fydd yn gyfrifol am y biniau gwastraff gardd brown, sy’n gorfod aros gyda’r eiddo sydd wedi tanysgrifio pe bai’r Cwsmer yn symud tŷ yn ystod y flwyddyn. Os yw’r Cwsmer yn symud tŷ o fewn Sir y Fflint, gellir trosglwyddo’r tanysgrifiad i’w cyfeiriad newydd. Cysylltwch â’r Cyngor i gadarnhau’r manylion drwy e-bost: streetscene@flintshire.gov.uk <mailto:streetscene@flintshire.gov.uk>. Os nad oes gan yr eiddo newydd yn Sir y Fflint fin brown, bydd angen talu £30 am y bin ei hun, a thalu am danysgrifiad ar wahân i’r Gwasanaeth, fel y nodwyd yng Nghymal 5. Os yw’r Cwsmer yn symud allan o Sir y Fflint, ni roddir ad-daliadau (llawn neu rannol).
9. Nid oes ad-daliadau (llawn neu rannol) am ganslo’r Gwasanaeth hanner ffordd drwy’r flwyddyn. Os oes tystiolaeth o gamddefnyddio’r Gwasanaeth neu o’r bin gwastraff gardd brown gan y Cwsmer, gallai’r Gwasanaeth gael ei ganslo. Ni fydd unrhyw ad-daliad (llawn neu rannol) o dan yr amgylchiadau hyn

10. Dim ond ar gyfer gwastraff gardd o’r eiddo sydd wedi’i danysgrifio gan y Cwsmer mae hawl i ddefnyddio bin(iau) gwastraff gardd brown. Dim ond gwastraff gardd y gellir ei roi yn rhydd yn y bin.

    Gwastraff gardd y gall y Cyngor ei gasglu: glaswellt, tocion gwrychoedd, brigau, rhisgl, dail, blodau, planhigion a changhennau bach

    Dim ond yr eitemau a restrir yn dderbyniol uchod y bydd y Cyngor yn eu casglu, a bydd unrhyw beth arall yn cael ei drin fel halogiad

11. Ni fydd biniau gwastraff gardd brown wedi’u halogi (h.y. biniau yn cynnwys eitem(au) na all y Cyngor eu derbyn) yn cael eu gwagio. Os yw bin(iau) gwastraff gardd brown y Cwsmer wedi’u halogi, cyfrifoldeb y Cwsmer yw symud yr eitem(au) wedi’u halogi cyn y casgliad nesaf. Os yw’r halogiad yn parhau, gall y Cyngor ddod â’r Gwasanaeth i ben. Ni fydd unrhyw ad-daliadau (llawn neu rannol) ar achlysuron pan fydd bin gwastraff gardd brown y Cwsmer heb ei wagio oherwydd halogiad
12. Rhaid rhoi’r bin gwastraff gardd brown wrth ochr yr eiddo neu’r man casglu dynodedig erbyn 7.00am ar ddiwrnod casglu’r Gwasanaeth, yn unol â’r calendr casglu a roddir i Gwsmeriaid gan y Cyngor. Rhaid cau caead y bin yn dynn, ac ni chesglir unrhyw wastraff ar yr ochr h.y. dim gwastraff ychwanegol tu allan neu wrth ymyl y bin neu wedi’i osod ar ben y caead. Os nad yw’r Cwsmer yn gallu mynd â’r bin gwastraff gardd brown at ymyl y ffordd oherwydd anabledd neu broblemau iechyd, mae’n rhaid iddynt wneud cais i’r Cyngor ymlaen llaw am Wasanaeth Casglu â Chymorth
13. Os yw bin gwastraff gardd brown y Cwsmer yn cael ei ddifrodi, bydd y Cyngor yn ei drwsio neu’n rhoi un newydd, am ddim, cyn gynted ag sy’n ymarferol o fewn rheswm, ac eithrio mewn amgylchiadau lle mae’r bin gwastraff gardd brown wedi’i ddifrodi drwy esgeulustod neu gamddefnyddio. Os felly, codir tâl ar y Cwsmer am ei drwsio neu am un newydd. Os yw bin gwastraff gardd brown y Cwsmer yn cael ei ddifrodi, gallant wneud cais ar-lein: www.siryfflint.gov.uk/gwastraffgardd
14. Gall cwsmeriaid mewn eiddo sy’n methu cael casgliadau bin brown am resymau gweithredol wneud cais am sachau gardd Cyngor Sir y Fflint am bris o £35.00 y rôl. Mae hyn yn cynnwys y pris tanysgrifio. Dim ond sachau a roddir gan y Cyngor a fydd yn cael eu casglu. Ceisiadau dros y ffôn yn unig: 01352 701234